Viser arkivet for stikkord jan

Første DJ-battle i Sogn og Fjordane komande fredag!

For første gang vert det skipa til discjockey-kamp i Sogn og Fjordane! Dette amerikanske fenomenet skal skje på Norevikane komande fredag.

Det er 80- og 90-talets mest kjende DJ i Sogn og Fjordane, Jan Erik Fredriksen, som skal kjempe om publikum sin gunst mot Robert «DJ Roberto» Sæbø. Dette unge platespelande talentet har den siste veka vore på treningsleir på Magaluf, medan Jan Erik har lagt seg i hardtrening på Norevikane.
- Eg er i storform, og satsar på at erfaring slår ungdommeleg talent, smiler Jan Erik.

Det er 20 års aldersforskjell på Jan Erik og Robert, men begge har ei brennande interesse for dansbar musikk. Dei starta begge sin karriere i Høyanger, og begge har trukke fulle dansegolv på Øren Hotel i Høyanger. No er det altså feriesenteret på Norevikane som blir åstad for den aller første offentlege DJ-kampen i Sogn og Fjordane.

Det er nok mange som hugsar Jan Erik frå den tida han og spelte på ulike diskotek i Førde. Dei siste 11 åra har han budd i Reykjavik på Island, der han driv stort innanfor reiselivsnæringa. Robert er ekte Høyanger-gut og innrømmer at han er lett inspirert av sin eldre kamp-motstandar.
- Det skal bli ei ære å få kjempe om danserytmane mot ein superveteran som Jan Erik, seier ein glisande og optimistisk, Robert.

Dronning Sonja på hemmeleg besøk i Høyanger

Sjølvaste dronning Sonja var i helga på hemmeleg besøk i Høyanger kommune. Laurdag morgon gjekk ho saman med ein livvakt over fjellet frå Norevikane til Ullebø i Vadheim.

Tekst og foto: Geir Bjarte Hjetland

Kongeskipet “Norge” ankom Norevikane ved nitida laurdag morgon, og dronninga vart sett i land på Norevikane med ein av skipet sine lettbåtar, såkalla sjalupp. Med sekk på ryggen vandra ho opp den bratte vegen til Fløyen, før ho nokre timar seinare kom gåande ned att til Ullebø i Vadheimsfjellet.

- Der vart dronninga henta av ein lukseriøs BMW, før ho vart køyrd til kommunekaia i Høyanger der ho gjekk ombord i kongeskipet igjen, fortel ein av dei som var så heldige å møte dronninga laurdag.

At vår kjære dronning elskar fjella både i Indre- og Ytre Sogn er ei kjend sak, og det er ikkje første gongen ho har besøkt Norevikane-området. Seinast for tre-fire år sidan var ho på fjelltur i same området.

- Det er verkeleg kjekt at ho går på fjelltur her i Høyanger kommune. Ho har skjønt kor vakkert og flott det er her, smiler turistvert på Norevikane, Jan Erik Fredriksen.

Dronninga sin høgst private og hemmelege tur kom i stand etter at kongeparet var på offisiell vitjing i Nordhordland. Dronninga har på turen langs Sognefjorden og vore mellom anna i Solund og i Finnafjorden.

KONGELIG TRANSPORT: Kongeskipet “Norge” på veg ut frå Høyanger laurdag ettermiddag, etter å ha henta Dronning Sonja.